A ISTORIA

La Historia 4 - La Tierra Muerta

A TIERRA

A tierra muerta ye un curtometrache que fabla d’a relazión de l’ombre con a tierra, d’as tradizions y as superstizions, d’as creyenzas irrazionals en tiempos d’escurantismo y d’o comportamiento de l’individuo debán d’a coleutividat.

Iste curtometrache surte de traza progresiva, ambientau en una radiz rural, con una istoria local, pero con l’obchetivo d’estar leyiu como que una istoria universal.

Ha estau rodau en bels lugars d’a Comarca de Calatayud (Ateca y Pajares de Calmarza), pero tratando d’aconseguir una ambientazión visual que pueda ir dillá de cualsiquier muga territorial, y de vegada, resaltando o protagonismo d’a tierra, d’os campos, d’a vida en o pasau y d’as tradizions latens.

La Historia 3 - La Tierra Muerta

O LUGAR

Con unas tradizions enradigadas en a tierra y a creyenzas que s’eslampan a toda lochica allena, o lugar de “La tierra muerta” funziona igual como una coleutividat ermetica que no en premite de discrepanzias.

Cualsiquier reazión individual ye custionada y toz remanen aparenmén aunius por uns intereses comuns alazetaus en a subsistenzia.

S’amagan d’o que suzeda difuera d’os suyos limites y creyen firmemén en actos y costumbres, que por tradición, mantienen intautos.

Ellos tienen os suyos propios mecanismos de defensa debán de cualsiquier menaza esterna u cualsiquier opinión individual. Mesmo fablan a suya propia luenga, l’aragonés, una forma d’entender-se y protecher-se debán d’o esterno y alleno.

No en dan cuentas a no dengún que no perteneixca a o suyo contesto. Un lugar amagau d’atros uellos que i puedan veyer dillá d’as suyas convizions.

La Historia 2 - La Tierra Muerta

A ISTORIA

En a istoria d’iste curtometrache condenso sin estar-ne conszién, as mías impresions sobre os comportamientos d’a coleutividat fren a l’autonomía individual, a perda de conesión de l’ombre con a naturaleza y a radiz como sentimiento de pertenenzia a un determinau puesto.

Todas istas impresions surten vinculadas a o momento presén, pero rescato y me baso en un imachinario popular (os lugars perdius, malditos, as tradizions de carnaval, os cultos anzestrals, as superstizions u l’espanto inerén a o ser umano), que ha estau alimentau por o zine y atras manifestazions.

Reflesiono sobre l’actualidat y vichenzia d’ixas istorias en o momento presén: creyenzas irrazionals, guerras de relichión, perda d’a individualidat en soziedat, entre muitas atras y me pareix faszinán que ixe imachinario popular y pagano pleno de misterios, pueda estar encara o refleixo, en parte, d’a soziedat d’o sieglo XXI.

Levar ista reflesión y as suyas multiples leuturas a o mundo audiovisual ha estau o mío prenzipal motor. A recuperazión dende a fizión de tradizions enradigadas universals, convertidas a vegadas en zeños simbolicos aparenmén distanziaus d’a realidat presén, fan que m’aiga custionau si siguen estando o telón de fundo de muitos d’os nuestros comportamientos enguán.

La Historia 6 - La Tierra Muerta

L'ORICHEN

En o suyo orichen lo proyeuto estió ligau a la leutura d’a controvertida obra “El verdadero Barba-Azul, la tragedia de Gilles de Rais” de Georges Bataille.

Enguán Gilles de Rais ye recordau en Franzia como Barba Azul, pero iste personache siniestro esistió, y Georges Bataille ya alvertiba que encara uei, en cadagún de nusatros, puet aber-ne un, amorlazau y sucheto por as convenzions d’a comunidat que mos rodía, un chicot Gilles de Rais.

O paralelismo d’a fegura de l’Extraño en o curtometrache “La Tierra Muerta” con o perfil de Gilles de Rais, confeguró un punto d’arranque, que más tardi va servir de refleixo con un lugar que l’observa. O lugar chudga a l’Extraño pero fa os mesmos actos que el y los adota d’una chustificazión sagrada, ritual que los imple de sentiu ta o lugar, igual como fa o propio Gilles de Rais.

Con iste punto d’arranque prenzipió o proyeuto, que se fuo perfilando, con a creyenza d’a vichenzia d’istos planteyamientos en o mundo autual, y ta ixo se farcha un imachinario propio que bebe en multiples fuens.

La Historia 5 - La Tierra Muerta

O CHIFLO Y O CHICOTÉN

A mosica tamién fa parte esenzial d’iste imachinario, ta ixo s’ha contau con trastes tradizionals aragoneses, como o chiflo y o chicotén. O compositor aragonés Eugenio Gracia ye l’artifize d’una Banda Sonora Orichinal, que se funde perfeutamén con l’esprito d’a istoria narrada. A interpretazión corre a cargo d’o propio Eugenio y o polifazetico mosicaire y profesor d’instrumentos tradizionals, Pepín Banzo.

A persistenzia d’a mosica tradizional aragonesa y d’os suyos paisaches, dan forma a ista istoria, que manimenos quiere ir dillá d’un momento. A mosica d’o palentino Alberto Acinas, drento d’a tendenzia autual de neorruralismo mosical en a eszena más contemporania, fa parte tamién de l’universo sonoro d’iste curtometrache como canzión de creditos finals.